ད་ལམ་ཉིན་གསུམ་གྱི་རིང་གསང་སྔགས་རྡོ་རྗེ་ཐེག་པའི་གལ་གནད་འགའ་ཞིག་གི་ཐོག་བགྲོ་གླེང་ཆེན་མོ་དོན་དང་ལྡན་པའི་ངང་ནས་ མཇུག་གྲུབ་པ།

དེ་ཡང་ཕྱི་ལོ་༢༠༡༣ ཕྱི་ཟླ་ ༨ ཚེས་ ༢༨ ཉིན་ཐོག་མར་དབུ་འཛུགས་སྐབས་༧སྐྱབས་རྗེ་བླ་དབུ་རིན་པོ་ཆེན་ནས་གསང་སྔགས་རྡོ་རྗེ་ཐེག་པའི་གཞུང་སྤྱི་དང་ལྷག་པར་མཐོང་བརྒྱུད་ཀྱི་ཕྱག་ལེན་ཟབ་མོ་རྣམས་མི་ཉམས་རྒྱུན་འཛིན་དགོས་གལ་ཆེ་བའི་སྐོར་བཀའ་སློབ་ཟབ་རྒྱས་གནང་

༧སྐྱབས་རྗེ་མཁན་ཆེན་རྡོ་རྗེ་འཆང་ཆེན་པོས་ཡི་དམ་གསང་བདེ་འཇིགས་གསུམ་གྱི་ཁྱད་ཆོས་དང་རྒྱུད་ཀྱི་བྱུང་རབས།  དེ་དག་གི་མཚན་དོན་དང་། རྒྱུད་དེ་རྣམས་ཐོག་མར་གནས་གང་དུ་གསུངས་པ། རྒྱལ་བ་རྡོ་རྗེ་འཆང་ནས་ད་ལྟའི་རྩ་བའི་བླ་མའི་བར་གྱི་བརྒྱུད་རིམ་བར་མ་ཆད་པ་ཇི་ལྟར་བྱོན་ཚུལ་སོགས་ཀྱི་སྐོར་གསུང་བཤད་དང་དོགས་འདྲི་ཁག་ལ་བཀའ་ལེན་གནང་།

༧སྐྱབས་རྗེ་བླ་དབུ་རིན་པོ་ཆེ་ནས་གསང་བདེ་འཇིགས་གསུམ་གཙོས་པའི་སྔགས་བླ་མེད་ཀྱི་ཆོ་གའི་སྐབས་ཕྱག་སྟབས་ཇི་ཡིན་ཚུལ་དང་། ལྷག་པར་རྒྱུད་སྡེ་གོང་འོག་གི་ཕྱག་སྟབས་ཀྱི་ཁྱད་པར། དེ་དག་གཞུང་གང་དུ་ཁ་གསལ་མིན་གྱི་སྐོར་ལ་གསུང་བཤད་དང་དྲི་བ་དྲིས་ལེན་གནང་།

དགེ་རྒན་ཆེན་མོ་སྔགས་རམས་པ་རྒན་དགེ་འདུན་ཚེ་རིང་མཆོག་ནས་གསང་བདེ་འཇིགས་གསུམ་གྱི་ས་ཆོག་དང་། སྦྱིན་སྲེག་བཅས་ཀྱི་སྐོར་ལ་མཐོང་བརྒྱུད་ཀྱི་ཕྱག་སྲོལ་བཟང་པོ་ཇི་ལྟར་ཡིན་ཚུལ་དང་།  དེ་དག་གི་གཞུང་ཚིག་རེ་རེ་བཞིན་འབྲུ་དེད་ཀྱི་གསུང་བཤད་ཟབ་རྒྱས་དང་དོགས་འདྲི་ཁག་ལ་བཀའ་ལན་གནང་། འདིའི་སྐབས་སུ་༧སྐྱབས་རྗེ་བླ་དབུ་རིན་པོ་ཆེ་དང་།  དཔེ་ཁྲིད་རྒན་དགེ་བཤེས་མཁན་གྲུབ་ནོར་བཟང་རྣམ་གཉིས་སྔགས་ཀྱི་གཞུང་ལ་མཁྱེན་རྒྱ་ཆེ་བ་མ་ཟད་ཆོ་ག་ཕྱག་ལེན་ལའང་ཐུགས་རྒྱུས་ཆེ་སྟབས་མཐོང་བརྒྱུད་ཀྱི་ཕྱག་བཞེས་དེ་རྣམས་རྒྱུད་དང་རྒྱ་གཞུང་ལྷག་པར་རྗེ་ཡབ་སྲས་ཀྱི་གསུང་གང་དང་གང་ལ་ཁུངས་ཐུག་ཡོད་མེད་ཀྱིས་ཟུར་རྒྱན་གྱི་ཚུལ་དུ་ལམ་སྟོན་དང་བཀའ་སློབ་གནང།

མཇུག་སྡོམ་སྐབས་༧སྐྱབས་རྗེ་མཁན་རིན་པོ་ཆེ་ནས་བཀའ་སློབ་གནང་བའི་སྙིང་དོན། རང་ཅག་རྣམས་བསྟན་པའི་རྩ་བ་ཕྱི་འདུལ་བའི་ཀུན་སྤྱོད་རྣམ་པར་དག་པ་ཞིག་དགོས་པ་ཤིན་ཏུ་གལ་ཆེ་བས་གཞི་གསུམ་གྱི་ཆོ་གའི་ཉམས་ལེན་ཚད་ལྡན་གནང་དགོས་པ་དང་། དེ་བཞིན་བསྟན་པའི་སྲོག་ཤིང་བྱམས་སྙིང་རྗེ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་བློ་སྦྱོང་དང་མྱོང་གོམས་གལ་ཆེན་ཡིན་པ། བསྟན་པའི་སྙིང་པོ་གསང་སྔགས་སྤྱི་དང་ལྷག་པར་རྒྱུད་ཀྱི་རྒྱལ་པོ་དཔལ་གསང་བ་འདུས་པ་ཡིན་པས་དེ་དག་གི་གཞུང་ལ་འཆན་ཉན་དང་སློབ་སྦྱོང་ཉམས་ལེན་གནང་གལ་ཆེ་ཚུལ། གཞན་ཡང་དགེ་འདུན་གྱི་འདུ་ཁྲིམས་སོགས་གལ་ཆེ་ཡིན་པས་རྩི་སྲུང་དགོས་པའི་བཀའ་སློབ་དང་བཅས་མཇུག་བསྡུས་སོ།། །།

      ས་ཡི་སྟེང་ན་འགྲན་པའི་ཟླ་བྲལ་བ།། འདུལ་བ་འཛིན་པའི་རིག་སྔགས་འཆང་བའི་སྡེ།། 

འདི་ཉིད་ཕྱོགས་དུས་གནས་སྐབས་ཐམས་ཅད་དུ།། དར་ཞིང་རྒྱས་པའི་བཀྲ་ཤིས་དམ་པ་སྩོལ།།