ལས་གཞི།

༄༅།།སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ཐེག་པ་ཆེ་ཆུང་སྔགས་དང་བཅས་པའི་གཞུང་ལུགས་རྒྱ་ཆེ་ལ་གཏིང་ཟབ་པ་འདི་དག་མི་ཉམས་རྒྱུན་གནས་ཀྱི་ཐོག་ནས་དད་འདུན་དང་སྦྱང་བརྩོན་ཆེ་བའི་ཕྱི་ནང་མི་རིགས་སྤྱི་ལ་ཕན་པའི་སློབ་གཉེར་གྱི་རྭ་བ་བཟང་པོ་ཞིག་བསྐྲུན་རྒྱུ་དང་། བྱེ་བྲག་ཏུ་དཔལ་ལྡན་སྟོད་རྒྱུད་གྲྭ་ཚང་གི་ཐུན་མོང་དང་ཐུན་མོང་མ་ཡིན་པའི་ཆོས་སྤྱོད་འཆད་ཉན་རྣམས་མི་ཉམས་རྒྱུན་གནས་ཡོང་བའི་ཐབས་ལ་འབད་དགོས་པ་དེ་ཡིན།

དང་པོ།

བོད་གངས་ཅན་གྱི་ལྗོངས་འདིར་དུས་འགྱུར་དབང་གིས་ཆེས་རིན་ཐང་བྲལ་བའི་རྩ་ཆེའི་གསུང་རབ་ཁ་འཐོར་དུ་སོང་བ་མང་པོ་ཞིག་རྩ་མེད་དུ་ཕྱིན་པ་སོགས་གོད་ཆག་ཚབས་ཆེན་བྱུང་བ་དེ་ཉིད་ཉམས་པ་སླར་གསོ་དང་། འཚོལ་སྒྲུབ་བྱེད་རྒྱུ་ནི་ལས་དོན་གལ་ཆེན་ཞིག་ཡིན་པས་འདས་པའི་ཆ་ལ་གང་འཚམ་མཁོ་སྒྲུབ་བྱས་ཡོད་ཀྱང་། ད་དུང་བྱས་པ་ལས་བྱ་རྒྱུ་མང་བ་ལྷག་ཡོད་པས་འབད་བརྩོན་བྱེད་མུས་ཡིན། གཞན་ཡང་ཡུལ་ལུང་གཞན་གྱི་སྐད་རིགས་ཐོག་ཏུ་ཡོད་པའི་ནང་ཆོས་ཀྱི་གཞུང་དང་ཐུན་མོང་གི་རིག་གནས་ཁག་གི་དཔེ་དེབ་གང་མང་མཁོ་སྒྲུབ་བྱེད་དགོས་པའང་དུས་ཀྱི་དགོས་མཁོ་གལ་ཆེན་ཞིག་ཡིན་པས་དེའི་ཐོག་ཏུ་འབད་བརྩོན་བྱ་རྒྱུ།

གཉིས་པ།

༸གོང་ས་༸སྐྱབས་མགོན་ཆེན་པོའི་ཐུགས་རྗེ་ཉག་ཅིག་ལ་བརྟེན་ནས་ནང་པ་སངས་རྒྱས་པའི་གཞུང་ལ་སྦྱང་བརྩོན་གནང་མཁན་ཕྱི་ནང་གི་མི་རིགས་མང་དུ་འགྲོ་བཞིན་པའི་སྐབས་འདིར་དཔེ་རྒྱུན་དཀོན་པའི་འཕགས་བོད་ཀྱི་གཞུང་ལུགས་དེ་དག་དོན་གཉེར་ཅན་རྣམས་ཀྱིས་ཉིན་རེའི་སློབ་སྦྱོང་ལ་སྨན་པའི་གསང་ཆེན་སྟོད་རྒྱུད་པོད་ཕྲེང་ཞེས་པ་དགོས་གལ་ཆེ་ཞིང་དཔེ་རྒྱུན་དཀོན་པའི་རིགས་རྣམས་དཔར་སྐྲུན་གྱི་ལས་གཞི་དངོས་སུ་དབུ་འཛུགས་ཟིན་ཞིང་ད་ཆ་དེབ་ཕྲེང་ཁ་ཤས་དཔར་བསྐྲུན་ཞུས་ཟིན་ལ།  ད་དུང་རྒྱུན་མཐུད་དཔར་བསྐྲུན་བྱ་རྒྱུ།

གསུམ་པ།

གསང་ཆེན་དཔལ་ལྡན་སྟོད་རྒྱུད་གྲྭ་ཚང་གི་ཉམས་བཞེས་ཆོས་སྐོར་གཙོ་བོ་གྱུར་པའི་གསང་སྔགས་རྡོ་རྗེ་ཐེག་པའི་དབང་ལུང་མན་ངག་གི་རྒྱུན་རྣམས་མི་ཉམས་རྒྱུན་གནས་དང་ཉམས་པ་སླར་གསོའི་ཐོག་ཏུ་འབད་བརྩོན་ལྷོད་མེད་ཞུ་རྒྱུ།

བཞི་པ།

གོ་སྐབས་ནམ་བྱུང་ལ་ཁྱད་ལས་པ་དང་མཁས་དབང་རྣམ་པ་གདན་ཞུས་ཀྱིས་གསང་སྔགས་ཀྱི་གཞུང་ཆེན་ཁག་དང་། མཐོང་བརྒྱུད་ཀྱི་ཕྱག་བཞེས་ཟབ་མོ། ཐུན་མོང་གི་རིག་གནས། དེང་དུས་ཀྱི་རྩིས་འཁོར་སོགས་ཀྱི་ཐད་ལ་དུས་ནས་དུས་སུ་ཟབ་སྦྱོང་གོ་སྒྲིག་ཞུ་རྒྱུ།

ཉམས་ཞིབ་དང་རྩོམ་སྒྲིག་ཚོགས་ཆུང་།

ཚོགས་གཙོ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་དང་། ཚོགས་གཞོན་༸སྐྱབས་རྗེ་མཁན་བླ་རྣམ་གཉིས་དབུས་པའི་ཚོགས་མི་ལྷན་རྒྱས་ནས་གྲྭ་ཚང་གི་ཆོས་འབྱུང་དང་འགྲོ་ཁུངས་མཆོད་དཔེ་བཅས་བསྐྱར་སྒྲིག་གི་སྐོར་ལ་བགྲོ་གླེང་གནང་བཞིན་པ།

རྩོམ་སྒྲིག་གི་ལས་གཞི་དབུ་འཛུགས།

ཆོས་འབྱུང་དང་འགྲོ་ཁུངས་བསྐྱར་སྒྲིག་གི་ལས་གཞི་འདི་ཉིད་གལ་གནད་ཤིན་ཏུ་ཆེ་བར་བརྟེན། དབུ་ལོ་དུང་ལྟར་དཀར་བའི་རྒན་གྲས་དབུས་རྒྱུན་ལས་རྣམས་ནས་ངལ་བ་ཁྱད་བསད་ཀྱིས་ཞོགས་པའི་ཆུ་ཚོད་༩པ་ནས་དགོང་མོ་ཆུ་ཚོད་༥པའི་བར་ཕྱག་ལས་གནང་བཞིན་པ་འདི་ནི་བསྟན་དོན་ཁུར་དུ་བླངས་པ་ཞིག་མཚོན།

རིག་གནས་ཟབ་སྦྱོང་།

བོད་ཡིག་དང་གློག་ཀླད་ཀྱི་ཁྱད་ལས་པ་རྒན་བློ་བཟང་སྨོན་ལམ་མཆོག་གདན་ཞུས་ཀྱིས་བོད་ཡི་གགློག་ཀླད་ནང་དུ་བེད་སྤྱོད་ཇི་ལྟར་བྱ་ཚུལ་དང་འབྱུང་འགྱུར་ཁོང་གི་ལོ་དགུའི་དུས་ཡུན་ཅན་གྱི་བོད་ཀྱི་ཚིག་མཛོད་ཆེན་མོའི་ནང་ཆ་ཤས་ལེན་སྟངས་ཀྱི་སྐོར་ལ་ཟབ་སྦྱོང་དང་འབྲེལ་བའི་དྲི་བ་དྲིས་ལན་གནང་བཞིན་པ།

གློག་ཀླད་སྦྱོང་བརྡར།

 འཛིན་གྲྭ་རྒན་རིམ་རྣམས་ལ་དཔེ་དེབ་དང་དཔེ་གཟུགས་གློག་ཀླད་ནང་བཟོ་བཀོད་ཇི་ལྟར་བྱ་ཚུལ་གྱི་སྦྱོང་བརྡར་སྤྲོད་བཞིན་པ།

དཔེ་མཚམས་པ་ཕྲུ་གུ་ལོ་ན་ཆུང་བའི་སྐབས་ནས་ཕྱི་ནང་གི་རིག་གནས་ལ་སློབ་སྦྱོང་གི་གོ་སྐབས་ཡོད་པ་མ་ཟད། གློག་ཀླད་ཀྱི་རྨང་གཞིའི་མཛུབ་ནོན་སོགས་རིམ་པས་སྦྱང་རྒྱུའི་གོ་སྐབས་ཀྱིས་མ་འོངས་པར་དོན་འབྲས་བཟང་པོ་ཡོང་བའི་གདེང་སྤོབས་ཡོད་པ།