 |
༧ གོང་ས་མཆོག་གི་བཀའ་ཞལ་ནས།
སྤྱིར་ང་ཚོ་མི་ལ་ཤེས་ཡོན་ཟེར་བ་འདི་གལ་ཆེན་པ་ཡིན། ཤེས་ཡོན་གྱི་མཐུན་རྐྱེན་གཙོ་ཆེ་ཤོས་ནི་སྔར་གྱི་མཁས་པ་ཚོས་ལོ་ནས་ལོ་བསྟུད་དེ་བསམ་བློ་གཏིང་རིང་པོ་བཏང་ནས་བྲིས་པའི་ལེགས་བཤད་འདི་ཚོའི་གྲས་ང་རང་ཚོའི་མིའི་རྣམ་དཔྱོད་འཕེལ་བའི་རྒྱུ་རྐྱེན་གལ་ཆེན་ཞིག་ཡིན་པ་རེད།ཞེས་གསུངས།
༧ ཀུན་གཟིགས་པཎ་ཆེན་རིན་པོ་ཆེའི་ཞལ་ནས།
ལོ་ངོ་ཆིག་སྟོང་ལྷག་གི་རིང་སྔོན་བྱོན་མཁས་པ་ཁྲི་ཕྲག་གིས་འབད་འབུངས་ཀྱིས་གསར་བཏོད་མཛད་དེ་ཤུལ་དུ་བཞག་པའི་བརྡ་སྤྲོད་ཀྱི་ནུས་པ་དང་། གཅིག་གྱུར་གྱི་རང་བཞིན། གོ་བདེ་དོན་ཟབ་ཀྱི་ལེགས་ཅ་བཅས་གང་ཐད་ནས་མི་དམན་པའི་བོད་ཡིག་དེ། རྒྱུ་མཚན་མེད་པར་ཝ་སྐྱེས་སེང་གེར་རློམས་མཁན་གྱིས་རང་འདོད་ལྟར་རྩེད་མོ་བརྩེས་པ་ནི་ཧ་ཅང་མ་འོས་པ་ཞིག་རེད།ཅེས་གསུངས།
༧ སྐྱབས་རྗེ་སློབ་དཔོན་ཟམ་གདོང་རིན་པོ་ཆེའི་ཞལ་ནས།
སྤུར་རྒྱལ་བོད་དུ་བརྡ་སྤྲོད་ཀྱི་རིག་གནས་ཁྱིམ་མཚེས་ཀྱི་ཡུལ་གྲུ་གཞན་ལ་ལྟོས་ཏེ་ཆེས་ཕྱིས་སུ་དར་བ་ཞིག་ཡིན་རུང་།
འཕེལ་རླབས་ཆེ་ཞིང་འཕེལ་རིམ་མྱུར་བས་དུས་ཡུན་ཐུང་ངུ་ཞིག་གི་ནང་འཇིག་རྟེན་འདིར་དོ་ཟླ་མེད་པའི་རྩོམ་རིག་དང་གཞུང་ལུགས་ཀྱིས་ཕྱུག་པའི་ཡུལ་འཁོར་ཞིག་ཏུ་གྱུར་པ་འདི་རང་རེའི་འདས་པའི་མི་རབས་ཀྱི་སྙིང་སྟོབས་དང་མཁྱེན་རབ་ཀྱི་ནུས་པ་བློ་ཡུལ་ལས་འདས་པ་ཞིག་བྱུང་བ་དེ་མཚོན་ཐུབ།
དུས་ཡུན་དང་མི་འབོར་ལ་གཞིགས་ཏེ་རང་རེའི་རྩོམ་རིག་སྒྲ་བསྒྱུར་དང་། རང་དབང་བའི་རྩོམ།
ཆོས་དང་འཇིག་རྟེན་གྱི་རིག་གཞུང་། ཚིག་རྒྱན་དང་གྲོང་ཚིག །ཐད་བརྗོད་དང་འཁྱོག་བརྗོད། བཅད་ལྷུག་སྤེལ་གསུམ།
བྱ་དཀའ་དང་བྱ་སླ། སྡེབ་སྦྱོར་གྱིས་བཅིངས་པ་དང་མ་བཅིངས་པ་སོགས་མདོར་ན་ངག་རིག་གི་རྩལ་དང་ཁྱད་ཆོས་སྲིད་དོ་ཅོག་མ་ཚང་བ་མེད་པའི་ངག་གི་རང་བཞིན་གྱི་དཔལ་ཡོན་གྲངས་འབོར་སྤུས་ཚད་གང་ནས་བསམ་རུང་།
འཛམ་གླིང་འདིར་བོད་དང་འགྲན་བཟོད་པའི་རྩོམ་རིག་གི་ལག་རྗེས་ཡོད་པའི་རྒྱལ་ཁབ་དང་མི་རིགས་སུའང་བྱུང་མེད་ཅེས་བརྗོད་རྒྱུར་ཁོ་བོར་ཐེ་ཚོམ་དང་ནེམ་ནུར་གང་ཡང་མེད།
No comments:
Post a Comment