རྒྱུད་སྟོད་དཔེ་མཛོད་ཁང་།

རྒྱ་བཏབ་ར་མོ་ཆེའི་རྟེན་གཙོ་ཇོ་བོ་མི་བསྐྱོད་རྡོ་རྗེ།

རྒྱ་བཏབ་ར་མོ་ཆེའི་གཙུགས་ལག་ཁང་འདི་ཉིད་དུ། ཐོག་མར་རྒྱ་ནག་གི་མཆོད་གནས། གསེར་གྱི་ལྷ་ཤཱཀྱ་མུ་ནེ་བཞུགས་པ་ཡིན་ནའང་། དབོན་ཞང་འཁྲུག་ལོང་བྱུང་བའི་ཚེ། ལྷོ་སྒོ་མེ་ལོང་ཅན་དུ་བཞུགས་སུ་བཅུག་པ་ལས། སླར་ཤཱཀྱ་མུ་ནེ་ར་སའི་གཙང་ཁང་དབུས་མ་དང་། མི་བསྐྱོད་རྡོ་རྗེ་ར་མོ་ཆེར་བཞུགས་པ་ཡིན་ཞིང་། དེ་ཡང་བོད་ཆོས་རྒྱལ་གྱིས་བློན་པོ་མགར་ལ་སོགས་པའི་ཕོ་ཉ་མང་པོ་བལ་ཡུལ་དུ་མངགས་ཏེ། ཇོ་མོ་ཁྲོ་གཉེར་ཅན་གྱི་སྤྲུལ་པ་ལྷ་གཅིག་ཁྲི་བཙུན་བཙུན་མོར་བསུས་པའི་དུས་སུ་ཁྲི་བཙུན་གྱིས། རང་གི་ཡབ་བལ་རྗེ་ལ། དེ་འདྲའི་མཐའ་འཁོབ་གནས་སུ་བདག་མཆི་ན། །བདག་གི་བསོད་ནམས་གསོག་པའི་མཆོད་གནས་སུ། །ཡབ་ཀྱི་མཆོད་གནས་ཤཱཀྱ་མུ་ནེ་ཞུ། །ཞེས་གསོལ་བའི་ལན་དུ། བདག་གི་མཆོད་གནས་ཤཱཀྱ་མུ་ནེ་ནི། །ཡོན་བདག་ལྷ་ཡི་དབང་པོས་བྱས་པ་ཡིན། །རྒྱུ་ནི་རིན་ཆེན་སྣ་ཚོགས་ལས་གྲུབ་པ།། བཟོ་བོ་ལྷ་ཡི་བི་ཤྭ་ཀརྨས་བྱས། །དེ་ཡང་སངས་རྒྱས་ཉིད་ཀྱིས་བྱིན་རླབས་ཡིན། །རྒྱལ་བ་ཉིད་ཀྱིས་རབ་ཏུ་གནས་པར་མཛད། །གང་ཞིག་ད་ལྟ་མཆོད་པ་བྱས་པ་དང་། །འདས་ནས་སྐུ་གཟུགས་མཆོད་པ་ཁྱད་མེད་གསུངས། །ཞེས་སོགས་བསླབ་བྱ་མང་པོ་དང་བཅས་ནས་བརྫངས་པའི་ཚེ། བྲག་དང་ཆུ་འཐབ་པའི་འཕྲང་ལ་ཞབས་ཐང་ལ་ཕེབས་པ་དང་། འོད་ཟེར་འཕྲོས་པའི་ལྷ་ཡིན་ནོ། སྤྱིར་ཡང་བརྒྱ་བྱིན་གྱིས་སྦྱིན་བདག་བྱས་ནས། རྒྱལ་བ་ཉིད་དགུང་ལོ་བརྒྱད་པའི་སྐུ་ཚད་དུ་བཞེངས་པར། སངས་རྒྱས་ཉིད་ཀྱིས་རབ་གནས་མཛད། ཇོ་བོ་ཤཱཀྱ་མུ་ནེ་དང་འདི་ཉིད་སྐུ་རྒྱུ་གཅིག་པར་ཆོས་འབྱུང་འགའ་ཞིག་ཏུ་སྣང་བ་ནི། རིན་ཆེན་སྣ་ཚོགས་འདུས་པར་བཤད་པ་དང་གུང་འགྲིག་པ་ཙམ་ཡིན་ཞིང་། ཐུབ་པ་ལྷ་ཡུལ་མ་ཇོ་བོའི་བཟོ་ཕུད་དུ་བཞེད་པ་ལྟར་ན་དཔྱད་དགོས། དུས་ཕྱིས་རྒྱུད་ཆེན་རྡོ་རྗེ་འཆང་ཀུན་དགའ་དོན་གྲུབ་དཔལ་བཟང་པོས་རྟོགས་པ་དང་བརྫུ་འཕྲུལ་ལ་མངའ་བརྙེས་པའི་རང་རྟགས་ཀྱིས་ལྷ་སའི་སྐྱིད་ཆུའི་འཇིགས་པ་ཞི་བར་བྱས་པས་གཞུང་ས་མཆོག་ནས་ར་མོ་ཆེ་རྟེན་དང་བརྟེན་པ་བཅས་བདག་རྐྱེན་དུ་ཕུལ། དེ་ནས་བཟུང་དཔལ་ལྡན་སྟོད་རྒྱུད་པའི་གདན་སར་གྱུར་པ་ཡིན་ནོ།།

རྒྱུད་འགྲེལ་ཆེ་མོའམ་ཡོངས་སུ་གྲགས་པ་འགྲེལ་བ་བཞི་སྦྲགས་ཀྱི་ངོ་སྤྲོད་དང་། རྗེ་བླ་མ་ཡབ་སྲས་ནས་དུས་ད་ལྟའི་བར་འཆད་ཉན་གྱི་རྒྱུན་ཇི་ལྟར་བྱུང་ཚུལ

དེ་ལ་འདིར་ས་གསུམ་གྱི་སྒྲོན་མེ་གཅིག་པུ་རྒྱུད་ཐམས་ཅད་ཀྱི་རྒྱལ་པོ་དཔལ་གསང་བ་འདུས་པའི་རྩ་བའི་རྒྱུད་ཀྱི་ཚིག་དོན་མ་ལུས་པ་འགྲེལ་པ་བཞི་སྦྲགས་པའི་སྒོ་ནས་ཇི་ལྟར་འཆད་བྱ་པར་བྱ་བའི་རིམ་པ་རྣམས་ཅུང་ཟད་བརྗོད་པར་བྱ་བ་ལ། དཔལ་གསང་བ་འདུས་པའི་རྩ་བའི་རྒྱུད་ཀྱི་རྒྱལ་པོ་ཆེན་པོ། དཔལ་མགོན་འཕགས་པ་ཀླུ་སྒྲུབ་ཀྱི་མན་ངག་ལ་བརྟེན་ནས་འཆད་པའི་ཚུལ་ལ་ཡང་། ཡི་གེ་བྲི་བསྣན་གྱི་སྒོ་ནས་བཤད་ཚུལ། གཞུང་གོང་འོག་དཀྲུག་སྟེ་བཤད་ཚུལ། རྒྱུད་རྐྱང་གི་བཤད་ཚུལ། རྒྱན་བདུན་གྱི་སྒོ་ནས་ཚོགས་པ་ལ་བཤད་ཚུལ་དང་། སློབ་མ་ལ་བཤད་ཚུལ་སོགས་བཤད་སྲོལ་ཤིན་ཏུ་མང་བར་གྲགས་ཤིང་། ཁྱད་པར་དུ་རྗེ་བཙུན་ལྷོ་བྲག་མར་པ་ལོ་ཙཱ་བ་ཆོས་ཀྱི་བློ་གྲོས་ལ། གྲུབ་ཆེན་ནཱ་རོ་པ་སོགས་ལས་བརྒྱུད་པའི་འདུས་པའི་མན་ངག་གི་བཤད་སྲོལ་མི་འདྲ་བ་བདུན་མངའ་བ་དང་། རྗེ་རིན་པོ་ཆེ་འགོས་ལོ་ཙཱ་བ་ཁུག་པ་ལྷས་བཙས་ལ། བླ་མ་མངོན་ཤེས་ཅན་དང་། བཙུན་མོ་ཅན་དང་། རྒྱལ་བུ་སྤྲིན་གྱི་ཤུགས་ཅན་དང་། ཙནྡྲ་ཧ་རི། ཛྙཱ་ན་ཀ་ར། བལ་པོ་མཐིལ་གྱི་ཧ་དུ། ན་ག་ཀོ་ཊི། ནག་པོ་དམ་ཚིག་རྡོ་རྗེ། ཇོ་བོ་རྗེ་དཔལ་ཨ་ཏི་ཤ་སོགས་ལ་བརྟེན་ནས་བརྒྱུད་པའི་འདུས་པའི་གཞུང་བཤད་ཀྱི་བཤད་སྲོལ་མི་འདྲ་བ་བཅུ་མངའ་བར་གསུངས་སོ། །དེ་ལྟར་རྒྱ་གར་གྱི་པཎ་གྲུབ་རྣམས་དང་། བོད་གངས་ཅན་གྱི་མཁས་གྲུབ་ཆེན་པོ་རྣམས་ཀྱི་བཤད་སྲོལ་གྱི་རྒྱུན་རྣམས། ཆུ་ལམ་བརྒྱུད་དང་། རྡོ་ལག་བརྒྱུད་ཀྱི་ཚུལ་གྱིས། མཁས་གྲུབ་ཆེན་པོ་ཁྱུང་པོ་ལྷས་པ་གཞོན་ནུ་བསོད་ནམས་དང་། གོང་གསུམ་པ་བདེ་ཆེན་ཆོས་ཀྱི་དཔལ་བ་དང་། མཉམ་མེད་རྗེ་བཙུན་རེད་མདའ་བ་གཞོན་ནུ་བློ་གྲོས་དང་གསུམ་ག་ལ་མངའ་བ་རྣམས། ཡབ་རྗེ་རྒྱལ་བ་གཉིས་པ་འཇམ་མགོན་བླ་མ་ཙོང་ཁ་པ་ཆེན་པོས་ཡོངས་སུ་རྫོགས་པར་གསན་པར་མཛད་དོ། །དེར་མ་ཟད་བླ་མ་རྗེ་བཙུན་འཇམ་པའི་དབྱངས་ཀྱིས་ཀྱང་། རྗེ་བདག་ཉིད་ཆེན་པོ་ལ་འདུས་པའི་སྨིན་གྲོལ་གྱི་ལམ་གྱི་མན་ངག་གི་གནད་འགག་མཐའ་དག་མ་ལས་པར་དངོས་སུ་འདོམས་པར་མཛད་པ་ལ་བརྟེན་ནས་ཐུགས་ཉམས་སུ་གཞེས་ཏེ། རྒྱུད་དོན་སྨྲ་བ་ལ་མི་འཇིགས་པའི་གདེངས་ཁྱད་པར་ཅན་ཐོབ་པའི་ཚུལ་བསྟན་པ་ན། འདུས་པའི་རྩ་རྒྱུད་ཆེན་པོའི་དགོངས་དོན་མཐའ་དག འགྲེལ་བྱེད་ཀྱི་གཞུང་བཞི་སྦྲགས་པའི་སྒོ་ནས་འཆད་པར་བྱེད་པའི་ཚུལ་འདི་ཉིད་གསལ་བར་མཛད་པ་ནི། སྔ་ན་མེད་པའི་ངོ་མཚར་བའི་ལེགས་བཤད་རྨད་དུ་བྱུང་བའི་ཁྱད་ཆོས་བླ་ན་མེད་པ་ཡིན་ནོ། །དེ་ལ་གང་བཤད་པར་བྱ་བའི་གཞིའམ་རྩ་བ་ལྟ་བུ་ནི་དཔལ་གསང་བ་འདུས་པའི་རྩ་རྒྱུད་ལེའུ་བཅུ་བདུན་པོ་འདི་ཡིན་ལ། གང་གིས་འཆད་པར་བྱེད་པའི་འགྲེལ་པ་ལ། ༼༡༽དཔལ་ལྡན་ཟླ་བ་གྲགས་པས་མཛད་པའི་སྒྲོན་གསལ་དང་། ༼༢༽རྗེ་བདག་ཉིད་ཆེན་པོས་མཛད་པའི་མཆན་གྱི་ཡང་འགྲེལ། ༼༣༽མཐའ་གཅོད་རིན་པོ་ཆེའི་མྱུ་གུ། ༼༤༽ས་བཅད་བསྡུས་དོན་དང་བཞི་ཡོད་དོ། །དེ་རྣམས་ཀྱིས་ཇི་ལྟར་འཆད་ན། སྒྲོན་མ་གསལ་བར་བྱེད་པ་ཞེས་བྱ་བའི་རྒྱ་ཆེར་བཤད་པས། ལེའུ་བཅུ་བདུན་པོ་རྣམས་ཀྱིས་བསྙེན་སྒྲུབ་ཡན་ལག་བཞི་སྟོན་པའི་ཚིག་དོན་མ་ལུས་པ་མཐའ་དྲུག་གིས་རྒྱས་པར་བཤད་པ་ཡིན་ནོ། །སྒྲོན་མ་གསལ་བའི་ཚིག་དོན་ཇི་བཞིན་འབྱེད་པའི་མཆན་གྱི་ཡང་འགྲེལ་ལ། དཀྱུས་མཆན་དང་། ཟུར་མཆན་གཉིས་ཡོད་པས། དང་པོ་དཀྱུས་མཆན་ནི། སྒྲོན་གསལ་གྱི་གཞུང་དཀྱུས་མའི་ཚིག་དོན་རྣམ་པར་འགྲེལ་པའི་མཆན་བུ་ཡིན་པས་ན་དཀྱུས་མཆན་ཏེ་དེས་རྩ་རྒྱུད་དང་སྒྲོན་གསལ་གཉིས་ཀའི་མན་ངག་གི་གནད་ཐམས་ཅད་གསལ་བར་འགྲེལ་བ་དང་། གཉིས་པ་ཟུར་མཆན་ལ། འགྱུར་མཆན་དང་། ཟུར་མཆན་དངོས་གཉིས་ཡོད་པས། ལོ་ཙཱ་བས་འགྱུར་མ་འདྲ་བ་རེ་ཡོད་པ་རྣམས་མཆན་གྱིས་གསལ་བར་བྱེད་པས་ན་འགྱུར་མཆན་ཏེ། དེས་འགྱུར་གྱིས་སྒྲ་དོན་མ་ཐོན་པ་དང་། སྒྲ་དོན་ཕན་ཚུན་མ་མཐུན་པ་དང་། སྒྲ་དོན་མི་གསལ་བ་དང་། སྒྲ་དོན་གོ་དཀའ་བ་ལ་སོགས་པ་རྣམས་འགྱུར་གཞན་དག་གིས་ཐོན་པར་བྱས་ཏེ། ཚིག་དོན་དང་མཐུན་པར་ཤིན་ཏུ་གསལ་ཞིང་གོ་བདེ་བར་བཀྲལ་བ་དང་། གཉིས་པ་ཟུར་མཆན་དངོས་ནི། དོན་ཟུར་པ་རྣམས་སྐབས་སུ་གང་བབས་ཀྱིས་འཆད་པར་བྱེད་པའི་མཆན་ཡིན་པས་ན་ཟུར་མཆན་ཏེ། དེས་གཞུང་གི་དོན་ཟུར་པ་རྣམས་ཀྱང་རྒྱུད་དང་འགྲེལ་པའི་དོན་ལ་ཕྱོགས་མཐུན་གྱི་ཚུལ་དུ་ཟུར་དུ་འགྲེལ་པར་མཛད་པ་སྟེ། དེ་ལྟར་དཀྱུས་མཆན་འགྱུར་མཆན་ཟུར་མཆན་གསུམ་གྱི་སྒོ་ནས་ངེས་ཤེས་བསྐྱེད་པར་བྱས་ཏེ་རྩ་རྒྱུད་ཀྱི་ཚིག་དོན་སྒྲོན་གསལ་གྱིས་ཇི་ལྟར་བཀྲལ་བ་རྣམས་སླར་ཡང་མཆན་གྱིས་རྣམ་པར་འགྲེལ་བའོ། །དཀའ་བའི་གནད་ཀྱི་མཐའ་གཅོད་རིན་པོ་ཆེའི་མྱུ་གུས་རྩ་རྒྱུད་དང་སྒྲོན་གསལ་གཉིས་ཀྱི་ཚིག་དོན་གྱི་དཀའ་བའི་གནས་རྣམས། རྒྱུད་དང་གྲུབ་ཆེན་གྱི་མན་ངག་ལ་བརྟེན་ནས་ཚིག་དང་དོན་གྱི་གནད་འགག་མ་ལུས་པའི་མཐའ་ཡོངས་སུ་གཅོད་པར་བྱེད་པའི་སྒོ་ནས་འགྲེལ་པར་མཛད་པའོ། །འདུས་པའི་རྩ་རྒྱུད་སྒྲོན་མ་རབ་ཏུ་གསལ་བར་བྱེད་པ་ཞེས་བྱ་བའི་རྒྱ་ཆེར་བཤད་པས་འཆད་པའི་ས་བཅད་བསྡུས་དོན་གྱིས། རྩ་རྒྱུད་དང་འགྲེལ་པ་སྒྲོན་གསལ་གྱི་ཁུངས་ནས་དོན་ཚན་གྱི་ས་བཅད་ལོགས་སུ་བཏོན་ཏེ་ཚིག་དོན་ཐམས་ཅད་བསྡུས་འགྲེལ་གྱི་སྒོ་ནས་གོ་བདེ་ཞིང་རྟོགས་པར་སླ་བའི་ཚུལ་གྱིས་འགྲེལ་པའོ། །དེ་ལྟར་ན་ཚུལ་ཇི་ལྟར་འཆད་པར་བྱེད་པའི་ཚིག་དོན་རྣམ་པར་བཀྲ་བའི་ས་བཅད་བསྡུས་དོན་གྱིས་དོན་ཚན་སོ་སོར་ཕྱེ་བར་བྱས་ཏེ། བཤད་བྱ་རྩ་བའི་རྒྱུད་ཀྱི་ཚིག་དང་དོན་གང་ཡིན་ངོས་ཟིན་པ་དེ་ཉིད། གང་གིས་འཆད་པར་བྱེད་པའི་འགྲེལ་པ་སྒྲོན་གསལ་གྱིས་མཐའ་དྲུག་དང་ཚུལ་བཞིའི་སྒོ་ནས་གཏན་ལ་ཕབ་པ་རྣམས་མཆན་གྱི་ཡང་འགྲེལ་གྱིས་སླར་ཡང་མན་ངག་གི་བཤད་པ་ལ་བརྟེན་ནས་སྨིན་གྲོལ་གྱི་ལམ་རིམ་པ་གཉིས་ལ་ངེས་པ་བསྐྱེད་ཅིང་། ད་དུང་རྟོགས་པར་དཀའ་བའི་གནད་ཕྲ་མོ་རྣམས། མཐའ་གཅོད་ཀྱིས་བཤད་དོན་ལ་ངེས་པ་ཆེན་པོ་སྟེར་བའི་ཚུལ་གྱིས་གཏན་ལ་ཕབ་སྟེ། དཔལ་གསང་བ་འདུས་པའི་ལམ་གྱི་སྙིང་པོ་ཐམས་ཅད་འཆད་ཉན་གྱི་སྒོ་ནས་ཆེས་ཤིན་ཏུ་གསལ་བར་བྱེད་པས་ན་འགྲེལ་པ་བཞི་སྦྲགས་ཞེས་བརྗོད་པ་ཡིན། ། ཡང་གསུང་ཚུལ་གཞན་ཞིག་ལ་འགྲེལ་པ་བཞི་ཀ་རྗེ་བླ་མ་ཙོང་ཁ་པས་མཛད་པ་ཞིག་དགོས་པའི་དབང་དུ་བྱས་ནས། ༡ དཀྱུས་མཆན། ༢ ཟུར་མཆན། ༣ མཐའ་གཅོད། ༤ ས་བཅད་བཅས་བཞི་ལ་ངོས་འཛིན་མཁན་ཡང་ཡོད་དོ།།

༈ གསང་ཆེན་དཔལ་ལྡན་སྟོད་རྒྱུད་པའི་ཐོག་མའི་རྡོ་རྗེ་སློབ་དཔོན་རྒྱུད་ཆེན་རྡོ་རྗེ་འཆང་ཀུན་དགའ་དོན་གྲུབ་དཔལ་བཟང་པོས་རབ་བྱུང་བརྒྱད་པའི་ཤིང་རྟ་ ཕྱི་ལོ་ ༡༤༧༤ ལོར་དབུས་སྟོད་བྱམས་པ་གླིང་དུ་ཐོག་མར་རྒྱུད་འགྲེལ་ཆེན་མོའི་འཆད་ཉན་དབུ་འཛུགས་གནང་བ་ནས་བཟུང་ད་ལྟའི་མཁན་རིན་པོ་ཆེའི་བར་མི་ལོ་ཧྲིལ་པོོ་༥༣༩ ཙམ་གྱི་རིང་རྒྱུད་ཀྱི་འཆད་ཉན་བར་མ་ཆད་པ་གནང་མུན་ཡིན་པ་དང་། དེ་དང་ཕྱོགས་མཚུངས་རྗེ་བླ་མ་ཙོང་ཁ་པ་ཆེན་པོས་གསང་སྔགས་ཀྱི་བསྟན་པའི་བདག་པོར་མངའ་གསོལ་བ་དཔལ་ལྡན་སྨད་རྒྱུད་པའི་ཐོག་མའི་སློབ་དཔོན་རྒྱུད་ཆེན་ཤེས་རབ་སེང་གེས་ཐོག་མར་རྒྱུད་ཀྱི་འཆད་ཉན་གནང་བ་ནས་མཁན་ཐོག་རིམ་པས་ད་ལྟའི་བར་མི་ཉམས་རྒྱུན་འཛིན་གནང་ཡོད། དོན་དེ་ལ་དགོངས་ནས་གནམ་ལ་གྲགས་པ་ཉི་ཟླ་གཉིས་དང་། ས་ལ་གྲགས་པ་རྒྱུད་གྲྭ་གཉིས་ཞེས་པའི་བཤད་སྲོལ་ཡོད་པ་དོན་ལ་གནས། 

ཁྱེན་ལྡན་ཕྱི་ནང་གི་མི་རིགས་རྣམས་ལ་ཞུ་རྒྱུ། ངོས་རྒྱུད་སྟོད་དཔེ་མཛོད་ཀྱི་དམིགས་ཡུལ་བཟུང་བ་བཞིན་གོ་སྐབས་ལོངས་སྤྱོད་མཁན་དག་ལ་ང་ཚོ་ངོས་ནས་མཐུན་རྐྱེན་དང་དགའ་བསུ་གང་ལེགས་བྱ་ངེས་ལ། ལྷག་པར་དུ་ཁྱེད་ཅག་རྣམ་པས་གོང་གསལ་ང་ཚོའི་དམིགས་ཡུལ་དང་ལས་གཞི་ལེགས་འགྲུབ་ཡོང་སླད་དུ་ལམ་སྟོན་དང་མཐུན་འགྱུར་ཡོང་བར་སྙིང་ནས་རེ་འདུན་ཞུ།

དཔེ་མཛོད་ཀྱི་ལས་བྱེད་ལྷན་རྒྱས།